Friday 19 February 2016

Raat Se Hui Baat!!!

Raat ayi mujse kehne ek baar, aaj neend ke badle mujse dosti karlo
Mujhe kuch kehne hai kai dino se tumse, to aj sapno se ankhe meench lo
Pehle thoda atpata laga, fir vyakul man ko ye prastav acha laga
Maine kaha chalo, ek pyali chai ke sath, baithe aur sune tumhari baat

Uski awaz ke sannate me, uske shabdon ki sachayi thi
Jo mere man ke kisi bohot veeran se kone ko kachot gayi
Jab jab wo kuch kehti, tab tab mere aise vichaar samne ate jinka mujhe kabhi abhas na hua
Uske jasbaat mere kuch aise jasbaaton ko jaga dete, jinki main kalpana bhi na karti thi
Wo prashn and uttar ka aisa chakrvyooh rachti, jisme main apne aap se hi lad baith ti

Kuch pal me hi main apne aapko koi aur pati, aur fir kuch pal me koi aur
Kabhi behad khush, kabhi kewal udas, kabhi gir gir kar hasti to kabhi foot foot kar roti
Aisa lagta jaise wo mujhe meri hi kayi anokhi shaksiyaton se pehchan karwa rahi thi
Fir kuch der hum dono hi chup ho jate, us khamoshi me jo sukoon tha
Wo neend ki gehre vadiyon me kabhi na mila

Din apne sath ujala lata hai, par us ujale me kayi cheezen chip jati hai
Din apne sath shor lata hai, jisme bohot si sachayiyon bus gum hoke reh jati hai
Din hame ek aise duniya dikhata hai jo hamne banayi hai, apne aaram ke liye
Raat ki khamoshi kuch naye raaz sunati hai, Raat ka andhera kuch naye drishya ujagar karta hai
Raat ek alag duniya dikhati hai jo hamesha rahegi, hum rahe ya na rahen, ujala rahe ya na rahe

Main apni in baton me khoyi thi jab neend ki ahat huyi
Usne kaha, chalo ab mere sath bhi do wakt bita lo, Raat tumhari humsafar to nahi
Maine palat kar dekha to Raat ja chuki thi… savera hone me bus do ghante reh gaye the
Maine guzri hui us Raat ko shukriya kaha aur sukoon se neend ki bahon me ghir gayi

Tamanna hai ki wo fir kisi roz ayegi aur fir mujhe mere kisi naye roop se milwa jaegi 

4 comments:

Unknown said...
This comment has been removed by the author.
Unknown said...

Ati Uttam. Jeevan ki sacchaiyon ko khubsurati se sabdo me piroya gaya hai. Yeh kavita un prashano ka uttar deti hai jinko hum apne din bahr ki bagh-daud me kahin talastae rah jate hain kintu unka jawab to raat ke akele aur shant vatavaran me hi mil sakta hai.

Bahut badhayian Aparna. Asha hai ki aap kavita ke madhyam se zindi ke kuch aur ankahe satya vicharon se is duniya ko avgat karate rahin.

Aparna said...

Thank you Mr. Pandey!!! :) :P...Yes i will try my best.

SAKET GARG said...

Bahut umda vichar, lajawab andaz-e-bayan. Kya bariki, kya jazbaaton ki bandish. Maza aa gaya. Aisa laga mano, woh raat aapse aapki baat karti-karti...mujhse, meri baat bhi keh gayi.
This one is simply awesome.
Keep writing!